Paianchi Vann

Tuji suropai
Fokot utranim
Tuji sobitai
Tachea dolleanim
Tuje mahan tyag
mottea letranim
Tukam obhiman
ruchik gitanim

Bapaichea agnnant
Tum apurbaiechi kanni!
Ghovache voddviken
tuji khup vakhanni
Putachea vosrean
ek sanj nimanni
Jivit tujem go, punn
jivitacho to dhoni

Tuje huxarkaien
Dekhli tannem pisai
Tuje suchovnnek
Manddli tannem loddai
Sogleach vatharant tum tez
Pun tum mukhar khoim!
Tujea gharant tum ek
sadi ostori nhoim?

Tachea dukhan
tum sodhpi sukh
Votan khinnbor savlli
Tukam diit khuimchoi rukh!
Tachea dolleanim polle
Sat somdirancho sorg
Tujea anvddeank mat
teoch laxman-rekha!

Ostori tum….
Tujem astitv kitem?
Bor kaddun rochlem tukam
Dilem tachea athan verem
Tujea mogacheo sanklleo
Tujeach paink ghalta revodd
Jivit bhor dadleak sangat
Itlich ostorechi zodd!!

Mahanponnacho ul'lekh
Tukam fokot sobdan
Ghorachea umbrea bitor
Tukam khuincho noman!
Kall bodol'le, ostore..
Pun dadleache rajyean
tum azun tich paianchi vann!!
Tich paianchi vann!!

Gracy Morais
Ribandar-Goa
(Kuwait)

FULANCHI BHAG

FULANCHI BHAG

Guimachea vosrean
Zumzumit molbhar
Xiuntem nachlem
Vareachea tallar

Aboleachea vonttank
choddla tambddo rong
Rojinnicho surngar sobit
Surnganim bhorla polong

Zayeancho zuyeancho
Bandhlo ghott mattov
Mogreanchea pormollan
Denvta sokallcho dov

Aplech suropaien
Dhalank choddla rubab
Razacho mukutt ghalun
Khell polleta gulab



Fulanchea pixean
Pakeancho khell
mhonvache ruchin
Musancho khuxall vell


.. Gracy Morais, Ribandar (Kuwait)

Drawing Competition

Our daughters took part in the Drawing Competition organized on Oct 23, 2009, by Goan Welfare Society-Kuwait as part of the GOA DAY 2009.

GAYNELLE

ADELA

Photo source: Laurie M.

Grace at her best in "Tiatristponn Devachem Dennem" - KGTS Mega Musical Show (Pictures only)

Source: GOA-WORLD website

Thanks. Gasper Almeida

Umannem (Kovita)

Monantlem vichitr umannem
Sang makam parkum koxem?
Chintnachem orixtt tufan-moll
Sangxi makam thonddaum koxem?

Mogachi bhass dili tuka
Jivitacho bandpass ditam taka
Kallzacho raza ekloch tum
Jivitacho dhoni kortam taka

Dhovi nessoun mhojea angar
Pornem uddoitam kaddun
Vorsancho sombondh tutt'ta aiz
Novea fuddarak dhortam voddun

Igorjecheo vazleo gantto
Zalo tacho mhozo ekvott
Mhoje polear tacho abrass
Khuxeal gorchim ganv sogott

Adleo modur yadi eyit kernaim
Mon mhojem roddot gai?
Sopnan passun mogache ubek tujea
Kalliz mhojem voddot gai?

.. Gracy Morais, Ribandar (Kuwait)

Amchea Gharan Kazar

Nimnnem bessaum ditanam, paichea dolleanim dukham zhorinim
Mainche suskar, chepunuch guele, ghor gazlem zotinim{1}
Bhavacho abras{2}, mogache ul'las, chirdole kallzanim
Bhoinanchi veng, khoxechim dukam, porzol'lim dolleanim

Uzvo pavom, dhara bhair poddtoch, kallzan dukh zali
Bavis vorsam, mhojeach angnnant, kitli apurbai keli
Kuddicho sando, zaddacho khando, mogan saulli dili
Mhojench pil, uddon veta, mainchi untti aiz khali

Tumche khoxen, ekvottlim kallzam, Vigaran vinchartoch nanvan
Ghanttancho ghonnghonn, fogacho boball, gazlo akhea ganvan
Ekvott tumcho, zalo sasnnacho, bessanv ghalum Devan
Lognancho sonvskar, khoxecho suskar, soddlo maim manvan{3}

Dhumpacho dunvor, tallieancho xinvor, svagot soirean-ixttancho
Laudad{4} munnon, ganvchea zanttean, axirvad maglo Devacho
Masacho dom-dom, muzgacho gom-gom, glass atan beer-icho
Konnacho bobau, bhurgeancho abau, soglo furfuro dansacho



Follinim chitranim, bizlechea laitinim, nettoila dansacho mattov
Kazari zhoddpim, gupit ansta, korun aplea kazracho attov{5}
Confeitticho paus, poddlo dogaincher, zalelea porim dov
San'wis veguim, toear kora go, bobauta randpinnicho ghov

Venguent dorun, march pas nachonk, okle noureak urba eilea
Dheddean apli nodor, fokot dheddiecheruch xirkailea
Cheddvam cheddeanim partner poilech vinchun dovorlea
Thoddeanim bar'rak tenkon apli kodel sambaulea

Porot porot vazat re, muzgank kele kansar
Oklek bossonk diunknam, nachoit raulea kumpassar
Chear panch voram dansachim kernam tori zait passar
Rat veguinch poddondi Deva, Nouro gupit korta rozar

Kazar borem zalem re, boro despeiz kelo kazarkaranim
Borem tinchem zaum, axirvad dilo xezaream soireanim
Amkam eklim soddat, bitorlean ul'las soddlo dogainim
Nouro okol ekamekache venguent ratrichea khinnanim
__________________________________________________________
1 = Traditional songs sung at the time of wedding
2 = Farewell Kiss
3 = Father-in-law
4 = Special prayer invoking blessing on the married couple
5 = fond memories


Gracy Morais
Ribandar-Goa (Kuwait)

Goeam etam, Goeam etam...

Don muineachi rojea meulea gue Maim
Goeam etam aum, Goeam etam aum..

Don vorsam oxim koxim zalim passar
Ganva bhair kam korun pordexi bhessar
Dis bhor vaur, gormecho tap, hinvacho bhar
Atam don muine susseg, moujen jivit sar

Maink nessonk guetlea viludachi saddi
Putachi apurbai pou’n urben marteli uddi
Makam ani kiteak re baba? Bexttoch dakoita nett
Bhaili saddi nesson festak polloi ticho jet

Manank festak guetla vistid tambddo
Stylish moche, kallo belt, make-up zambddo
Bhavan sanglam aplea kott zavo kavo
Pursanvank hacho jetuch pollouk zavo

Cher, tiki, kalafurancho gharan poddla vas
Chokletti, badam, pista, began dista ras
Bleddi, cigarancho bandla motto bhoro
Ur’rak ani cigar, Pai Carnaval fuloitolo boro

Ani teka…um...bhangarachi mudi voir thik azul
Dolleank dolle meutoch, aum sarkoch zatolom gul
Don vorsam uprant zateli bhett porot
Chint’tam kitem bogot jernam porot ami mevot

Hea vorsa raunchonam zatam aum kazar
Tuka mhojem korun guetam sobhemazar
Kazar fuloitolom moddun zaitech ozar
Ekvott amcho veguinch zaunk sodanch kortam rozar

Chear voramchem viman aiz kiteak soukas danvta
Goeam veguim pavonk zai, Goencho moipas makam ravta
Nodor tujer ghalunk, kitlo axeta aum
Don vorsam somplim go, Goeam etam aum, Goeam etam aum..

… With love to Goa and Goenkar
Gracy Morais
Ribandar (Kuwait)

X'Mas 2008 and New Year 2009 with Grandma & Mai